حساب الوزن و الوقت للطباعة ثلاثية الأبعاد

اصنع سنثسيزر باستخدام أردوينو
July 7, 2015
سلسلة أردوينو – Zero to Hero – توصيل مستشعر مسافات ultrasonic proximity sensor
July 12, 2015

طبعا الأيام دى الطباعة ثلاثية الأبعاد بقت مهمة جدا فى معظم مشاريعنا بس المشكلة اللى بتقابلنا علطول هى إننا نتأكد من تكلفة الطباعة و هتاخد وقت قد ايه قبل ما نبدأ طباعة…فى المقالة دى هنمشى خطوة خطوة إزاى نقدر نعمل ده 😀
مبدئيا التصميم بتاعك لازم يكون ثلاثي الأبعاد و الExtension بتاع الفايل يكون .stl أو .obj  و دول صيغتين تقدر تعملهم export من أى برنامج تصميم ثلاثي الأبعاد

 

1- تحميل البرنامج
ال3D Printer اللى موجودة فى فاب لاب مصر هى MakerBot Replicator 2 و البرنامج المخصص ليها اسمه Makerware و اتغير اسمه من قريب و بقى Makerbot Desktop و ده تقدر تنزله على جهازك من هنا:
http://www.makerbot.com/desktop 
و متنساش تختار نظام التشغيل المناسب ليك قبل ما تدوس دانلود
1

و انت بتعمل setup هتطلعلك الرسالة دى كذا مرة أكتر من 3 مرات مفيش مشاكل..علم على ال Checkbox و دوس install2

بعد ما تخلص تحميل البرنامج و تعمله Install افتح بقى البرنامج 😀


2- تشغيل
البرنامج
*اختار من القائمة اللى فوق Prepare هيطلع قدامك شكل محاكى لشكل القاعدة اللى الطابعة بتبنى عليها بنفس حجمها الحقيقى و هو تقريبا بيكون 28x15x15 cm
*لازم تتأكد من اختيار الطابعة الصحيح من قائمة Devices هتختار Replicator 2 زى ما موضح فى الصورة
3

*الخطوة اللى بعدها إنك تختار من القائمة Settings و لازم تتأكد من 3 حاجات:
1- الRaft و ده لازم تخليه متعلم عليه علطول و دى جزء بيبتنى الأول الطابعة بتبنى عليه بعد كده الحاجة بتاعتك و بيخليها مستقرة و ثابتة.
2- ال Support و ده بيتوقف على التصميم بتاعك..زى ما انتوا عارفين الطابعة بتطبع طبقة فوق الطبقة اللى تحتها فلو فيه أجزاء عندك فى التصميم متعلقة فى الهواء أو مفيش حاجة تحتها لازم تتأكد إن معلم على الcheckbox و لو مش محتاجه ممكن تشيله عادى (طبعا خد بالك إن ال Support ده بيزود عدد جرامات بس فيه حالات مينفعش تبنى الحاجة بتاعتك من غير دعامات)

3- الInfill و ده بيحدد الobject بتاعك ده مليان من جوه بلاستيك قد ايه و ده طبعا بيأثر على قوة و صلابة الحاجة بس الطبيعى إنك تسيبه 10% و ده بيخليه قوى كفاية بس لو بتطبع أجزاء ميكانيكية و عليها ضغط زى التروس مثلا ممكن تخليها 15% أو أقصاها 20% (و ده طبعا برضه بيزود عدد جرامات)
4

3- تجهيز التصميم
*من جنب كلمة Setting هتختار Add File و هتختار التصميم بتاعك عشان يظهر قدامك.
من الخطوة دى هتقدر تستخدم 4 أدوات عشان تتحكم فى الشكل اللى قدامك:
1-أول واحدة فوق هى Look أو Change View و منها تقدر تشوف التصميم بتاعك من الاتجاه اللى انت عايزه.
2- اللى بعدها هى Move و تقدر تحرك التصميم بتاعك على قاعدة الطابعة و تثبته فى المكان اللى انت عايزه.
3- اللى تحتها Rotate و تقدر تلف التصميم بتاعك و تعكسه 90 درجة او زى ماتحب و تخليه يبقى على وشه أو ضهره أو جنبه ( ودى أهم أداة لأنك لازم بعد ما تخلص تختار Lay Flat عشان تتأكد إنه خلاص بقى مريح على القاعدة كويس و ملامس ليها)
4- أخر أداة و هى Scale و تقدر تكبر و تصغر التصميم بتاعك زى ما انت عايز.
5

3- حساب الوقت و التكلفة
هيتبقى أخر خطوة خلاص و إنك بعد ما تتأكد من كل حاجة تختار Export Print File هتلاقيه بدأ يحمل كل المعلومات و هتظهر فى الاخر نافذة صغيرة مكتوب فيها هتاخد وقت قد ايه و هتلاقى زرار اسمه Print Preview هتدوس عليه هتظهرلك نافذة أكبر فيها محاكاة للتصميم بتاعك لما يتطبع و فوق على اليمين الطباعة هتاخد وقت قد ايه بالظبط و كام جرام طباعة
6

تقدر تضرب عدد الجرامات فى سعر تكلفة الجرام عشان تعرف التكلفة الكلية..بس كده طباعة سعيدة 😀

  • Wael Mekky

    سعر تكلفة الجرام قد ايه؟

    • Omar ElSafty

      تكلفة الجرام بتكون 5 جنيه

      • Wael Mekky

        ينفع أبعت ملف الطباعة وتتبعتلي اسكندرية وأدفع الشحن؟

  • Mohamed A. Hafiz

    كنت بسأل اذا في حد ممكن يعملي التصميم وتنفذولي الطباعة.. هل موجود عندكم ؟؟

  • omar

    ده لازم طابعة ماكربوت غير كده لأ صح ؟؟